Samskrá um einkaskjalasöfn - um 765 skráningar frá Héraðsskjalasafninu á Akureyri

Nú er unnið að gerð samskrár yfir einkaskjöl í skjalasöfnum landsins. Nefnd skipuð fulltrúum frá Héraðsskjalasafninu á Akureyri, Héraðsskjalasafninu á Ísafirði, Þjóðskjalasafni Íslands og Landsbókasafni Íslands Háskólabókasafni hefur unnið að undirbúningi skrárinnar og sér Þjóðskjalasafnið um að safna saman skráningunum í eina heildarskrá sem síðan verður aðgengileg á netinu. Þetta er hið þarfasta verk því að skjöl einstaklinga, félaga og fyrirtækja liggja í söfnum víða og ekki er auðvelt að vita hvað er hvar og skjöl hverra hafa skilað sér inn á söfn.
Í skránni verða upplýsingar um viðkomandi skjalamyndara, hvert var hans starfssvæði, í hvaða safni skjölin liggja og yfir hvaða tímabil þau ná og í sumum tilfellum ennþá nánari upplýsingar svo sem hvaða skjöl þetta eru og hversu mikil þau eru að umfangi.
Héraðsskjalasafnið á Akureyri mun skila inn í þessa skrá nöfnum um 350 einstaklinga og um 415 félaga í fyrstu lotu, en síðar má búast við ítarlegri viðbótarupplýsingum og viðbótum eftir því sem fleiri skila sínum skjölum til safnsins.