Heill þér mæta, merka kona
Sýningin var opnuð 4. júní og stóð út mánuðinn og var á 1. hæðinni í Brekkugötu 17, húsi Héraðsskjalasafns og Amtsbókasafns.
Tilefni sýningarinnar var 100 ára afmæli kosningaréttar kvenna til Alþingis árið 2015.
Ávarpið í heiti sýningarinnar gæti átt við mjög margar konur, en það er sótt í ljóð sem Elísabet Geirmundsdóttir listakona orti til Elísabetar Eiríksdóttur, kennara og bæjarfulltrúa, sextugrar.
Sýningin byggðist á skjölum sem varðveitt eru í Héraðsskjalasafninu á Akureyri og er þar um að ræða frumskjöl sem varða kosningar, kvennabaráttu, kvenfélög, kvennaklúbba og einstakar konur, þ.e.a.s. kvennaskjöl í víðasta skilningi þess orðs.
Vilhelmínu Lever var minnst sérstaklega en hún varð fyrst kvenna á Íslandi til þess að kjósa við bæjarstjórnarkosningar árið 1863. Þess má geta að önnur kona, Kristbjörg Þórðardóttir, var þá einnig á kjörskrá en nýtti sér ekki „kosningaréttinn“ sem reyndar var ekki óyggjandi.
Einnig var þeirra þriggja kvenna sem fyrstar tóku sæti í bæjarstjórn Akureyrar minnst. Það voru þær Kristín Eggertsdóttir kjörin 1911 og sat í 3 ár, Halldóra Bjarnadóttir árið 1921 og sat í 1 ár og áðurnefnd Elísabet Eiríksdóttir, sem tók þar sæti 1927 og sat alls í 19 ár.
Á sýningunni voru sendibréf, dagbækur, fundargerðabækur, fálkaorðuskjal, heiðursborgaraskjal, meðmælendalistar til framboðs, ræða þingmanns og margt fleira sem of langt væri upp að telja.
Einnig voru á sýningunni listar yfir konur í sveitarstjórnum við Eyjafjörð, listar yfir þingkonur Norðurlandskjördæmis eystra og Norðausturkjördæmis auk yfirlits í tímaröð yfir áfanga í sögu kvenna og brautryðjenda við Eyjafjörð.